काठमाडौं । समाजमा निःस्वार्थ सेवा, समर्पण र सकारात्मक योगदान पुर्याउँदै आएका व्यक्तित्वहरूलाई सम्मान गर्ने उद्देश्यले आयोजित ‘गुराँस आदर्श व्यक्तित्व सम्मान कार्यक्रम–२०८३’ काठमाडौंको नयाँ बानेश्वरमा सम्पन्न भएको छ। गुराँस फाउन्डेसनको आयोजनामा कार्तिक २१ गते शनिबार सम्पन्न कार्यक्रममा समाजसेवा, शिक्षा, व्यवसाय, कला, बौद्धिक तथा सञ्चार क्षेत्रका विभिन्न व्यक्तित्वहरूलाई सम्मान गरिएको हो।
कार्यक्रमकी प्रमुख अतिथि पूर्व उपसभामुख एवं प्रतिनिधिसभा सदस्य इन्दिरा रानामगरले समाज र राष्ट्र निर्माणका लागि व्यक्तिगत स्वार्थ तथा अहंकारभन्दा सामूहिक जिम्मेवारी र प्रणालीगत सुधारलाई प्राथमिकता दिनुपर्ने बताइन्।
उनले ‘इगोको राजनीति नगरौँ, देशलाई सिस्टममा लैजाऔँ’ भन्ने धारणा राख्दै राज्यका हरेक निकायमा सबै जातजाति तथा समुदायको समानुपातिक र समावेशी प्रतिनिधित्व सुनिश्चित हुनुपर्नेमा जोड दिइन्। विविधतायुक्त नेपाली समाजको वास्तविक प्रतिबिम्ब राज्य सञ्चालनका सबै तहमा देखिनुपर्ने उनको भनाइ थियो।
कार्यक्रमका सभापति एवं गुराँस फाउन्डेसनका अध्यक्ष पाल्देन लामाले विगत दुई दशकदेखि दुःखी, असहाय तथा विभिन्न समस्यामा परेका नागरिकहरूको सेवामा आफूलाई समर्पित गर्दै आएका छन्। मानवीय संवेदना, परोपकार र सामाजिक उत्तरदायित्वलाई व्यवहारमै उतार्दै आएका लामाको नेतृत्वमा फाउन्डेसनले सामाजिक सेवाका गतिविधिहरूलाई निरन्तरता दिँदै आएको छ।
उनको अगुवाइमा सञ्चालित सामाजिक अभियानले सम्मान कार्यक्रमलाई व्यक्तिको उपलब्धिको कदर गर्ने माध्यम मात्र नभई समाजमा सेवाभाव, सहयोग र मानवीयताको संस्कार विकास गर्ने अभियानका रूपमा स्थापित गरेको छ।
समाजमा योगदान पुर्याउने व्यक्तित्वहरू सम्मानित
कार्यक्रममा समाजसेवी, शिक्षक, बुद्धिजीवी, व्यवसायी, कलाकार तथा सञ्चारकर्मीलगायत विभिन्न क्षेत्रका व्यक्तित्वहरूलाई सम्मान गरिएको थियो।
समाजमा सकारात्मक परिवर्तनका लागि आ–आफ्नो क्षेत्रबाट निरन्तर योगदान पुर्याउँदै आएका व्यक्तिहरूको पहिचान, सम्मान र कदर गर्दै उनीहरूलाई थप सामाजिक जिम्मेवारी निर्वाह गर्न प्रेरित गर्नु कार्यक्रमको मुख्य उद्देश्य रहेको आयोजकले जनाएको छ।
गुराँस फाउन्डेसनका अध्यक्ष पाल्देन लामाको सभापतित्वमा सम्पन्न कार्यक्रमको सञ्चालन रुपा घिसिङले गरेकी थिइन् भने मिलन लामाले स्वागत मन्तव्य व्यक्त गरेका थिए।
कार्यक्रममा रुद्रसिंह तामाङ, इन्द्रराज भट्टराई, नेत्रप्रसाद गौतम, कमानसिंह मोक्तान, टीका माल्बुके, देवकुमार मगर, लालबहादुर मगर, राम मोक्तान, आशिष नगरकोटी, दानबहादुर रानामगर, खड्गबहादुर श्रेष्ठ, लालबहादुर थापामगरलगायत विभिन्न क्षेत्रका शिक्षक, बुद्धिजीवी, समाजसेवी तथा व्यवसायीहरूको उपस्थिति रहेको थियो।
सामाजिक सेवामा प्रेरणा दिने उद्देश्य
समाजमा सकारात्मक सोच, मानवीय सहयोग र परोपकारी भावनाको विकास गर्न यस्ता सम्मान कार्यक्रमले महत्वपूर्ण भूमिका खेल्ने विश्वास आयोजकले व्यक्त गरेको छ।
समाजमा निःस्वार्थ सेवा गर्ने व्यक्तिहरूको योगदानलाई सार्वजनिक रूपमा सम्मान गर्दा अन्य व्यक्तिहरूलाई पनि सामाजिक कार्यमा सहभागी हुन प्रेरणा मिल्ने आयोजकको भनाइ छ।
‘गुराँस आदर्श व्यक्तित्व सम्मान कार्यक्रम–२०८३’ ले समाजमा सेवा, सहयोग र मानवीयताको महत्वलाई पुनः उजागर गर्दै असल कर्म गर्ने व्यक्तिहरूको पहिचान र सम्मान गर्ने सन्देश दिएको छ।
समाजका लागि गरिएका असल कर्म नै वास्तविक सम्मानका आधार हुन्। अरूको दुःखमा साथ दिने हात, समस्यामा परेकालाई सहयोग गर्ने मन र समाज परिवर्तनका लागि गरिने साना प्रयासहरूले नै सभ्य, समावेशी तथा समुन्नत समाज निर्माणमा महत्वपूर्ण योगदान पुर्याउँछन्।
